Welcome To Tamang Samaj UK

आदरणीय तामाङ समुदायका सदस्यज्यूहरू, शुभेच्छुकहरू, तथा सम्पूर्ण नेपाली दाजुभाइ तथा दिदीबहिनीहरूमा लस्सो फ्याफुल्ला

म Tamang Samaj UK को अध्यक्षको रूपमा यो जिम्मेवारी सम्हाल्न पाउँदा गर्व, सम्मान र कृतज्ञताको अनुभूति गरिरहेको छु। तपाईंहरूले देखाउनुभएको विश्वास, समर्थन र साथप्रति म हृदयदेखि धन्यवाद ज्ञापन गर्न चाहन्छु ।

तामाङ जाति नेपालको आदिवासी जनजाति समुदायमध्येको एक हो, जसको आफ्नै गौरवपूर्ण इतिहास, भाषा, धर्म, संस्कृति र परम्परा छ। हाम्रो समुदायले सदियौंसम्म हिमाली क्षेत्रको जीवनशैलीलाई आत्मसात गर्दै शान्तिपूर्ण, सहिष्णु र श्रमशील चरित्र प्रदर्शन गर्दै आएको छ। युद्ध, राजनीति, धर्म, संस्कार, शिक्षा र कला-साहित्यका क्षेत्रमा तामाङ जातिको अमूल्य योगदान रहेको छ। यही ऐतिहासिक गर्वले आज हामीलाई हाम्रो पहिचानप्रति दृढ बनाएको हो ।

विदेशी भूमिमा बस्दा हामी हाम्रो माटोबाट टाढा हुन्छौं, तर हाम्रो मन, संस्कार र आत्मा त्यो माटोमै गाडिएको हुन्छ। यही सोचले Tamang SamajUK ले प्रवासमा बस्ने तामाङ समुदायबीच भाइचारा, सहकार्य, संस्कृति संरक्षण र सामाजिक उत्तरदायित्वलाई अगाडि बढाउँदै आएको छ।

आजको दिनमा हाम्रो सन्तानहरू फरक भाषा, फरक परिवेशमा हुर्किरहेका छन्। यस चुनौतीपूर्ण समयको माग हो- हाम्रो संस्कृति, भाषा र पहिचानलाई नयाँ पुस्तामा हस्तान्तरण गर्ने। Tamang Samaj UK ले यसै लक्ष्यलाई केन्द्रमा राखेर सांस्कृतिक कार्यक्रम, भाषा कक्षा, प्रशिक्षण, अन्तरक्रिया र प्रवासी एकता अभियानलाई प्राथमिकता दिँदै आएको छ।

हामी हाल नयाँ सदस्यता अभियान पनि सञ्चालनमा ल्याउँदैछौं। संस्थामा सहभागी भई तपाईंहरूले आफ्ना सुझाव, ऊर्जा र सिर्जनशीलता ल्याउनुहुनेछ भन्ने हाम्रो अपेक्षा छ। हामी सबै मिलेर एउटा यस्तो समाज निर्माण गर्न चाहन्छौं जहाँ सबैको आवाज सुनिन्छ, सबैको पीडा बुझिन्छ, र सबैको पहिचान सुरक्षित रहन्छ ।

आउनुहोस्,

आफ्ना जरा सम्झौं,

पहिचान बचाऔं,

संस्कृतिमा गर्व गरौं,

र एकताको बलमा प्रवासमा पनि Tamang Samaj UK लाई अझ सशक्त बनाऔं ।

"हाम्रो इतिहास गौरवशाली छ, हाम्रो संस्कृति जीवन्त छ, र हाम्रो एकता नै हाम्रो शक्ति हो ।

"पहिचान बचाऔं, एकता बलियो बनाऔं, र संस्कृतिलाई जीवन्त राखौं ।' संस्कार, संस्कृति र पहिचानको संरक्षण - यही हो हाम्रो अभियान ।'

धन्यवाद। थुजिछे ।

कुमार स्याङतान तामाङ

अध्यक्ष (President)

Tamang Samaj UK